ოპერაცია ♥ ♥ ♥ მიაუ ♥ ♥ ♥

რა თავსატეხი გამიჩნდა თქვენ ხომ არ იცით!

ეს მინდოდა ეხლა მე?!

ამასწინათ ავტყდი სახლში კატა მინდა მეთქი!გადამაფიქრებინეს!დღეს კი თითქოს ვიღაცამ საგანგებოდ გამომიგზავნა პატარა ფისუნია!

ჯერ კიდევ გუშინწინ აბაზანაში რომ შევედი,კედლის უკან,საჰაერო რომ არის,იქიდან კატის კნავილი შემომომესმა,კატის კი არა–კნუტის!ვიფიქრე,უეჭველი საჰაეროში ჩავარდა თქო!ხმა ზუსტად ჭერიდან მოდიოდა.მაგრამ ზედა სართულის მეზობელთან მაინც ავედი,ვკითხავ მეთქი,ეგებ სახლში ყავთ კატა და აბაზანაში ყავთ გამოკეტილი და მაგიტომ კნავის–არ დამხვდნენ სახლში!რამოდენიმე ხანში ხმა აღარ ისმოდა და ვიფიქრე თვითონ გაძვრა-გამოძვრა და  კი უშველა თავს თქო!

მეორე დღეს რვის ნახევარზე გავედით სახლიდან–ექსკურსიაზე წავედით,და გვიან მოვბრუნდით,არც საღამოს და არც ღამე კნუტის ხმა არ გამიგია.აი დღეს დილით კი,როგორც კი აბაზანაში შევედი,გასაცოდავებული კნუტის კნავილი რომ გავიგონე კინაღამ ცუდად გავხდი–სამი დღეა გასული და ისევ იქ არის კნუტი!

ჩემს ქმარს ვუთხარი ეს ამბავი და არაფერი თქვა,მაგრამ ხომ ვიცოდი მაგის ამბავი–რა გააჩერებდა!ცოტა ხანში ვხედავ,აბაზანაში სკამი,ფარანი და ინსტრუმენტები შეაქვს,მოხსნა საჰაეროს ბადე და იჭყიტება შიგ.დარწმუნდა, რომ მართლა იქიდან მოდიოდა ხმა!

ბევრი რომ არ გავაგრძელო,ორი საათი იწვალა ჩემმა ქმარმა!ამოამტვრია იმ საჰაეროს აყოლებაზე კედელი, რომ ადვილად მისდგომოდა იმ ადგილს საიდანაც კნუტის კნავილი ისმოდა!ხო,ზემოთა მეზობელთან ავირბინე და ისიც ცალკე წვალობდა თურმე, მეოთხე დღეა ასე კნავის ეს კნუტიო,შეწუხებუკლი იყო უკვე იმის ცოდოთი,და თვითონაც კედლის ამომტვრევას ფიქრობდა.

საბოლოოდ თვალი მოვკარით ფისუნიასაც! გაფართოებული თვალებით იყურებოდა და  საცოდავად კნაოდა!რის ვაი-ვაგლახით ჩამოვიყვანეთ!(მერე ნახევარი დღე სახლი ვალაგე,იმდენი ნამტვრევები და მტვერი იყო!)

ისეთი გასაცოდავებული,გამურული და შეშინებული!მაგრამ ძალიან ლამაზი!სულ კანკალებდა და აშკარად შოკში იყო!დედჩემმა ჩვენი დუჩის საწოვარა და რძე ამომიგზავნა და მძლივს-მძლიობით ვაჭამე ცოტა.(ლამბაქზე დასხმული არ მიირთვა–ძალიან პატარაა ეტყობა).მერე სამზარეულოს კარადის ქვეშ მოყუჟდა და კაი ხანი იქ იყო.

კიდევ კარგი,აბაზანა არ მაქვს გარემონტებული,თორე ჩემი სართულიდან ამას ვერ ამოვიყვანდით!

ნელ-ნელა შეგვეჩვია მე და ხატიას.ცოტა თამაშობს კიდეც,დღეს უკვე 3 ჯერ ვაჭამე რძე.ვაბანავე!ისეთი შავი იყოოოოო,სახლში ერთი დღეც ვერ გავაჩერებდი ასეთს!მერე ხატიამ ფენით გააშრო,და გაფუმფულდა და გამოჩნდა მთელი მისი სილამაზე! 🙂

ორგან ხატიას ნაკაწრი აქვს და ხვალ ექიმთან წავიყვან და ვაჩვენებ,მაინც მეშინია,კნუტსაც წავიყვან ვეტერინართან.

ხო,ხატია მეხვეწება დავიტოვოთო,და ვერ გადამიწყვეტია,ვნახოთ საღამოს ჩემი მეუღლე მოვა და მერე მოვიფიქრებთ.ერთი კია,რომ ცოტას წამოვზრდი აუცილებლად და პატრონს გამოვუძებნი სხვას,თუ დატოვებას არ გადავწყვეტთ.

ხატიამ დაარქვა ”summer”-ი ,ბიჭია თუ გოგო ვერ ვარჩევ მე,ხვალ ვეტერინარი მეტყვის.

უკვე ყველგან დძვრება!დარბის და როცა შია კნავის ხოლმე!

მოკლედ ასეთ დღეში ვარ!

ეხლა მიზის აგერ მუხლებზე და ტკბილადაც სძინავს,და სულ არ ადარდებს რა სადარდებელი გამიჩინა მე!

P.S. ორი წლის შემდეგ…..

ვერსადაც ვერ გავუშვი,მაშინვე დავიტოვე და ჩვენი ოჯახის სრულუფლებიანი წევრი გახდა

საოცრად ჭკვიანი ფისოა,თუმცა ცოტა უკარება.ისე, თავიდან უფრო უკარება იყო, ეხლა ცოტა მოთბა.უკვე ორი წელი გახდა,რაც სახლში მყავს და მის გარეშე ცხოვრება წარმოუდგენელია ჩემთვის.ძალიან გვიყვარს და კარგად ვპატრონობთ.ისე, ლაქის ერთი კარგი პოსტი კი ეკუთვნის,რაც მაგან შემდგომში გადაგვატანინა და ალბათ ამისთვისაც მოვიცლი. 🙂

ჰო,ლაქი დავარქვით (lucky),რადგან ნამდვილად იღბლიანია  ❤